ДЮРДЬОВ –Подзелок, 5. октобра у обидвох дюрдьовских образовних установох – Основней школи (ОШ) „Йован Йованович Змай” и Предшколскей установи (ПУ) „Дзецинство” оддзелєнє „Дюрдєвак”, почали активносци з нагоди означованя Дзецинского тижня чий тогорочни мото „Же би дзеци були щешлїви – любов, почитованє, а нє сила”.
Вчера дзеци у ПУ з родичами мальовали и прикрашовали мурик у Рускей улїчки, а дзекуюци добрей дзеки вихователькох и родичох на муре, окрем по сербски, виписане мено Установи и на руским язику. Патрели и театралну представу „Єшеньска чаролия”.
Отримани и Єшеньски дзецински вашар на котрим дзеци по символичней цени предавали свойо ручни роботи. Нащивени и Азил за животинї у Моники Брукнер и општинска народна библиотека, а планована и нащива писателя.
У дюрдьовскей ОШ того року под час Дзецинского тижня школяре шицких возростох маю пригодни креативни роботнї на хторих маю направиц тисяч паперово журавлї за преславу Дня демократскей култури у їх Школи котра будзе отримана о два тижнї.
