КОЦУР – З покладаньом венцох на памятнїк погинутим борцом на площи опрез Школи, Месна орґанизация Здруженя борцох НОВ у Коцуре вчера означела Дзень ошлєбодзеня у Другей шветовей войни. З тей нагоди отримана и кратка програма.
Присутних привитал пресидатель Месней орґанизациї здруженя борцох НОВ Бранко Андїч, а потим венци положели представителє Општини Вербас, на чолє з предсидательом Општини Миланом Ґлушцом, представителє Месней заєднїци Коцур, коцурскей и месних орґанизацийох борцох зоз сушедних местох.
З минуту цихосци дата почесц погинутим борцом и пречитани їх мена, а як знак здогадованя на нїх оглашела ше и сирена. Весна Радошевич Пешут и Мария Горняк пречитали по єдну писню, а у програми з рецитациями участвовали и школяре седмей класи ОШ „Братство єдинство”, котрих пририхтала Снежана Шанта.
На памятнїку у центре Коцура виписани мена 55 борцох котри страдали у Другей шветовей войни, як и три мена борцох котри страдали у войнових зраженьох у бувшей Югославиї од 1991. по 1999. рок.