ВЕРБАС – У просторийох КПД „Карпати” у Вербаше проф. др Янко Рамач вчера вечар отримал преподаванє з тему „Присельованє и живот Русинох/Українцох у Угорскей од XIV-XVIII вик”.
Нащивительох привитал предсидатель Дружтва др Деян Загорянски, а од проф. др Рамача присутни достали обсяжни информациї о мену „Русин, Руснак, Рутенус”, о вири, язику, писменосци, образованю, присельованю до Угорскей, обставинох у Угорскей, односно живоце Руснацох у малих валалох, перших знакох културного националного препороду при Руснацох и другим. Нащивителє после преподаваня поставяли и питаня, найвецей о руских презвискох.
Др Янко Рамач на сходзе у Вербаше гварел же таки преподаваня єдна з перших конкретних акцийох Рускей инициятиви, як з историї, так и з других обласцох нашого националного живота.
