НОВЕ ОРАХОВО – Tогорочнa Централнa преславa Националного швета Руснацох у Републики Сербиї отримує ше нєшка у Новим Орахове.
Централна преслава почнє з Архиєрейску Службу Божу хтора ше будзе служиц у Церкви Христа Спасителя од 17 годзин.
Шицки други програми буду у Доме култури Нове Орахово. На 18:30 буду поставени етно-столи Активу женох КУД Жатва з Коцура, а на 19:15 почнє промоция кнїжки Вично тирва 13. май о прешлосци рускей заєднїци у Новим Орахове, чийо коавторе Любо Рац и Олена Папуґа.
На 20 годзин почнє центална подїя преслави у Новим Орахове, Шветочна академия. На Академиї наступя секциї КУД Петро Кузмяк з Нового Орахова зоз солистом Борисом Маґочом, Хор Церкви Успения Пресвятей Богородици з Коцура под руководством Александра Планкоша, як и Национални оркестер под руководством Мирослава Папа.
Тогорочна Централна преслава Националного швета Руснацох будзе 19. по шоре, а друга хтора ше отримує у Новим Орахове. Предходна була 2014. року. Националне швето Руснацох ше од 2008. року означує каждого 17. януара.
Орґанизатор Централней преслави Националного швета Руснацох Завод за културу войводянских Руснацох у сотруднїцтве з Националним свитом Руснацох, КУД Петро Кузмяк з Нового Орахова, МЗ Нове Орахово и Општину Бачка Тополя.