РУСКИ КЕРЕСТУР – Зоз початком другого школского полрочя, вчера, пондзелок 20. януара, зоз пригодну програму, националне швето Руснацох означели и школяре у Школи „Петро Кузмякˮ.
Програму, на трох школских годзинох, у школским голу, пририхтали школяре висших класох осовней школи и школяре руских оддзелєньох Ґимназиї, а з помоцу свойого наставнїка историї Деяна Бучку.
На початку, кратки реферат о значносци означованя Националного швета Русанцох пречитали Алекса Сопка и Емина Бики. Потим, пригодни писнї з тей нагоди пречитали школярки Ребека Сабадош и Мая Надь, док на концу програми, два шпиванки на руским язику у провадзеню зоз ґитару, одшпивали школярки Анита Чизмар, Дорияна Пап, Мая Сопка, Кяра Будински, Андрея Надь и Клара Катрина.
