ВЕРБАС – III Вербаске обегованє будзе отримане 7. мая, а траса по хторей буду бежац шицки учашнїки догварених обегованьох находзи ше у даскельо улїцох у центру Вербаса, наявели орґанизаторе Општина Вербас и Вербаски атлетски клуб.
Старт и циль обегованя будзе у улїци Маршала Тита на Площи Николи Пашича. На дзень обегованя, у периодзе од 8 по 14 годзин буду за транспорт заварти улїци Маршала Тита и Сави Ковачевича од крижаня зоз улїцу Ґустава Крклеца (при Главней пошти), по крижанє з улїцу Буди Томовича.
Отрамаю ше обегованя на 5 километри и 10 км (хторе источашнє и Першенство Сербиї на 10 км на драги), обегованє на 1 км за припаднїкох Войска и Полициї, обегованє на 100 метери за особи зоз почежкосцами у розвою, дзецинске обегованє на 100 м (предшколци, 1. и 2. класа), 200 м (3. и 4. класа), 400 м (5. и 6. класа), 500 м (7. и 8. класа).
Заєднїцки старт обегованьох на 5 км и 10 км будзе на 12:15 годзин. Старт обегованя на 1 км припаднїкох Войска и Полициї на 11:30 годзин, а старт шицких обегованьох за дзеци на 11 годзин.
Право участвовац на Вербаским обегованю маю шицки заинтересовани, порядно приявени и психофизично способни за таку файту активносци хтори виплаца надополнєнє за участвованє. Вони ше можу приявиц зоз пополньованьом онлайн формулара на интернет бокуː https://trka.rs/events/333/, а з орґанизатором можу контактовац прейґ имейл адресиː vrbaskiatletskiklub@gmail.com.
Дзецински обегованя ше приявює на имейл адресу vrbaskiatletskiklub@gmail.com, а малолїтни особи можу участвовац на змаганьох на 5 и 10 километри лєм зоз согласносцу родичох або старательох.
Стартни пакет за учашнїкох на 5 и 10 километри облапя: чиповане стартне число, медалю, маїцу и фляшку води. За шицких учашнїкох будзе орґанизоване окрипенє. Лимит обегованя 2 годзини.
