4. ЮНИЙ – На нєшкайши дзень першираз отримани Стретнуца руских школох.
1917 – Першираз додзелєна Пулицерова награда (Pulitzer Prize). Награду ше додзелює за найвекши доприношеня у новинарстве, литератури и компонованю музики, а додзелює ю Универзитет Колумбия зоз Нюйорку. Мадярско-америцки новинар и видавач Джозеф Пулицер установел награду кед цали свой маєток до нашлїдства охабел Универзитету Колумбия.
1994 – Першираз отримани Стретнуца руских школох у Бачинцох (Општина Шид, Срим). Стрeтнуца иницировали: Ирина Папуґа и Василь Мудри, члени Дружтва за руски язик, литературу и културу и Мирослав Бульчик, наставнїк зоз Шиду хтори теди, 1993/1994. школского року, орґанизовал годзини руского язика у Шидзе и Бачинцох. На пeршим стретнуцу, попри школярох зоз Бачинцох и Шиду и їх родичох, перши госци були школяре зоз Нового Саду и Вербасу зоз своїма наставнїцами Славку Сабадош и Славицу Мали. У роботней часци стретнуца участвовали и просвитни роботнїки – учителє хтори скорейших рокох отримовали наставу руского язика у сримских местох: Мелания и Василь Мудри, Славка Рогаль и Ксения Саламон зоз Шиду и Мария Ракич зоз Бачинцох, як и Никола Кнежевичи Вукадин Божович, теди директоре основних школох у Шидзе.
2022 – Першираз отримани Фестивал традицийних руских єдлох Смаки традициї у Руским Керестуре. Фестивал орґанизовало Здруженє гражданох Руска скарбнїца, а софинансовали го Покраїнски секретарият за образованє, предписаня, управу и национални меншини-национални заєднїци и локална самоуправа Општини Кула.
Нєшка Медзинародни дзень дзецох жертвох насилства (International Day of Innocent Children Victims of Aggression), запровадзела го Ґенерална скупштина Зєдинєних нацийох.