РУСКИ КЕРЕСТУР – Националне швето, 17. януар, зоз шветочну програму, означене и у школским голу Школи „Петро Кузмякˮ.
Програма почала зоз руску шветочну шпивамку „Браца Русини”, а швето потим зоз пригоднима словами присутним повинчала директорка Школи Наталия Будински.
През програму присутних школярох и просвитних роботнїкох водзели школяре Ґимназиї – Ема Живкович и Андрей Сабо. Вони, медзи иншим, крадко здогадли на урядово початки насельованя Руснацох на тоти простори, як и о важносци очуваня руского язика и писма, обичайох, култури и очуванє идентитету.
Зоз рецитациями и музичнима точками програму збогацели и школяре висших класох основней школи – Теодор Гарвильчак на гармоники, Никола Петкович на тамбури, а Милена Рамач, Заря Ковач и Кристина Жеґарац одрецитовали найпознатши писнї руских авторох.
Попри шветочней програми Националне швето означене и зоз виставу малюнкох котри приказовали елементи рускей култури, а хтори пририхтали школяре шицких других класох тей школи.
Шветочну програму зоз школярами пририхтали – професорка руского язика Любка Малацко, и наставнїци руского язика Каролина Джуджар и Тамара Хома.
