НОВИ САД – Преслава Националного швета Руснацох отримана пияток 17. януара у Руским културним центре (РКЦ) у Новим Садзе.
Нащивительох и учашнїкох привитал предсидатель Управного одбору РКЦ Славко Винаї, хтори здогаднул на историят и контекст 17. януара односно на початок присельованя Руснацох на тоти простори, а потим у кратких рисох представел дїялносц и мисию РКЦ.
Спред Националного совоту Руснацох (НСР) швето повинчовал предсидатель Вивершного одбору НСР Славиша Сабадош, хтори ґу тому здогаднул же у тим року Дзень Руснацох, хтори славиме од 2008. року, здобул полнолїтство.
Як госц РКЦ швето повинчовал и Миодраґ Лонич, предсидатель Союзу културно-уметнїцких дружтвох Сербиї чиї член и РКЦ.
У културней програми наступела Мишана шпивацка ґрупа РКЦ под руководством Борута Павлича, хтору на гармоники провадзел Давор Сабо, а наступела и млада рецитаторка Антония Сабадош.
Мишана шпивацка ґрупа РКЦ нєшка наступи и на Шветочней академиї централней преслави Националного швета Руснацох у Сримскей Митровици.