РУСКИ КЕРЕСТУР – Млади зоз валалу котри порушоваче потримовки студентским протестом, студенти и школяре, поволую гражданох на мирни протест наволани „По дражкох правди” котри будзе отримани наютре од 16 до 18 годзин у центру валала.
Сход почнє у центру на 16 годзин, присутни годни участвовац у интерактивним полиґону под назву „Заобидз корупцию”, потим на 17 годзин бешедовац будзе наш визначни атлетичар Михаил Дудаш, а на 17:30 буду отримани 16 минути цихосци за жертви траґедиї на Желєзнїцкей станїци у Новим Садзе 1. новембра прешлого року.
Под час протесту за присутних будзе обезпечени напой и закуска, а за наймладших нащивительох обдумани креативни куцик за розвагу.
Як и потераз, орґанизаторе буду примац донациї истого дня од 14 до 16 годзин при фонтани у центру валала. Мож однєсц овоци, рижни слани и слатки кифлочки, та и лакотки, овоци, соки, воду и кафу. Як наглашую, шицко цо останє як вишок после протесту, буду донирац студентом у блокади на новосадским универзитету. Тиж годно дац и пенєжни донациї. Дзекуюци донацийом зоз скорейших протестох обезпечели промотивни материял, и орґанизацию будуцих сходох.