ВЕРБАС – У просторийох Културно-просвитного дружтва „Карпати” у Вербаше зоз пригодну програму пияток, 10. януара означене Националне швето Руснацох.
Святочну програму отворел хор КПД „Карпати” зоз гимну „Боже правде” и святочну шпиванку „Браца Русини”. Числену публику и госцох, присутних членох Националного совиту Руснацох и його предсидателя Йоакима Раца, як и пароха старовербаского о. Алексия Гудака привитал предсидатель Дружтва Микола Папуґа, а присутним пар слова гварел и предсидатель Националного совиту Рац.
Вецей о присельованю Руснацох до наших местох, нашей историї, образованю и култури бешедовала и Александра Лендєр Деянович, котра водзела и конферансу того вечара.
У першим блоку програми публика могла уживац у точкох котри порихтали наймладши, та так пар шпиванки одшпивали Михаела Миклош, Маґдалена Будимски, Драґана и Милена Корпак, а порихтала их Милена Алексич. Тиж, школярка котра учи руски язик з елементами националней култури Андєла Влахович одрецитовала писню, а ю порихтала учителька Славица Мали.
У другим блоку наступели солисти Янко Сеґеди и Йовґен Чизмар зоз пар шпиванками, а потим по першираз зашпивала и дириґентка Милена Алексич. Їх провадзел оркестер Дружтва, под руководством Любомира Сакача Андрия. Програму заварли домашнї, члени хору КПД „Карпати”, а у шпиву им ше придружели и присутни.
Окрем красней и богатей програми, публика могла видзиц и вецей кнїжки друковани на руским язику з конца 19. и початка 20. вику, а медзи нїма и перше виданє „Ґраматики руского язика” Гавриїла Костельника зоз його подписом. Кнїжки рускей заєднїци подаровала Єлена Кузма, котра и членїца КПД „Карпати” од його снованя.
По законченю програму, домашнї госцом пририхтали закуску и ошвиженє, та ше друженє и преславйованє Националного швета Руснацох предлужело.
