НОВЕ ОРАХОВО – На шветочней академиї у рамикох централней преслави Националного швета Руснацох у Сербиї, тот значни дзень за руску заєднїцу повинчовали предсидатель Националного совиту Стеван Самочета, владика кир Георгий Джуджар, предсидатель Општини Бачка Тополя Адриян Сатмари, помоцнїк министра за людски и меншински права и дружтвени диялог Стефан Срблянович, и подпредсидатель Покраїнскей влади Томислав Жиґманов.
Предсидатель Националного совиту Стеван Самочета винчовал швето зоз пригоднима словами о тим як ше Руснаци селєли през историю, а потим представел и кратки план як провадзиц крочай зоз сучаснима виволанями, першенствено думаюци на руску енциклопедию, руско-анґлийски словнїк, руску википедию, ґуґл прекладач, штучну интелиґенцию…
– Руснаци ше приселєли до Нового Орахова зоз Руского Керестура, руске заренко ту зашате пред 80 роками дало значни плод зоз хторим ше руска заєднїца може лєм цешиц. Треба мац на розуме же у чаше приходу Руснацох до Нового Орахова, Руснаци були припознати лєм у Сербиї, односно у тедишнєй Югославиї. На матичней териториї у карпатским ареалу були административно висцерани, и таки жалосни стан по нєшка лєм у єдней жеми на швеце. Так як Войводина постала цепли дом колонистом, Руснацом зоз карпатского ареалу, так и Руснацом зоз Керестура цепли дом дало Нове Орахово, односно Бачка Тополя – медзи иншим гварел Стеван Самочета.
Владика кир Георгий Джуджар винчовал швето зоз акцентом на витирвалосц Руснацох у Новим Орахове, нагадуюци на длуговичносц орехох по котрим тот валал ноши мено.
– Позберали зме ше ту у Орахове по други раз же бизме преславели националне швето, же бизме потримали тоту заєднїцу котра пред 80 роками як желєни младнїк ту пресадзени и ту на ораховскей жеми ше приял и пущел коренї. Же бизме потримали тоту заєднїцу у витирвалосци исц далєй по тей драги по котрей крачали и нашо предки уж 275 роки. Тото швето и нагода же бизме ше и ми шицки котри зме ту и котри буду з нами, обновели и утвердзели у вирносци и дошлїдносци идеалом котри зме нашлїдзели, а то жиц у злагоди и миру и єдносци, и почитованю вредносцох, духовних, националних, културних. У тих вредносцох котри пестовани през ферталь тисячрочя и пущели глїбоки корень и виросли до єдного велького, моцного и желєного древа – винчовал владика кир Георгий Джуджар.
Спред локалней смаоуправи, предсидатель Општини Бачка Тополя Адриян Сатмари тиж так мал нагоду повинчовац швето присутним, праве вон указал на мултикултуралне богатство тей општини, и валалу Нове Орахово. Свою бешеду почал зоз пригоднима словами по руски.
– Прешло осем децениї як руска заєднїца постала состойна часц Нового Орахово, односно општини Бачка Тополя, пишиме ше з тим же у нашей општини жию припаднїки вецей националносцох, и на факт же Руснаци зоз свою традицию, язиком и културу збогацую нашо заєднїцки вредносци. Тота преслава нагода же бизме ше здогадли вредносцох, спатрели терашньосц и виплановали будучносц. Пред 80 роками Руснаци ше нє лєм приселєли ту, алє ту пренашли и свой дом, и вєдно означуєме таку значну рочнїцу – гварел Адриян Сатмари.
Помоцнїк министра за людски и меншински права и дружтвени диялог Стефан Срблянович у своєй бешеди здогаднул на мултикултуралне богатство Войводини, а спред ресорного министерства обецал потримовку.
– Барз важне же шицки людзе на просторох нашей сиверней покраїни сотрудзую и жию вєдно, шицки дзелїме исте щесце, и исту жалосц, и нє постої нїяки способ и потреба же бизме ше дзелєли по тим же хтора зме нация, хторей зме вири, або на яким язику бешедуєме. Алє же бизме тоти розлики препознали як богатство и же бизме на нїх робели и попробовали же би нас повязовали. Ми як ресорне министерство и Влада РС на чолє зоз предсидательом держави Александром Вучичом ту вам будземе партнер, и потримовка у будучносци за шицко цо ви думаце же за вас и за вашу општину важне – визначел Стефан Срблянович.
Указуюци на добру орґанизованосц рускей заєднїци, насампредз у обласцох котри у инґеренциї националного совиту подпредсидатель Покраїнскей влади Томислав Жиґманов повинчовал швето Руснацом.
– Почитовани домашнї и госци по шоре и чесци як вам швечи, у мено Покраїнскей влади и єй предсидательки Маї Ґойкович и у мойо мено вам винчуєм националне швето и жадам вам шветлу будучносц. А ви ю маце, бо тримаце до култури здогадованя. Култура здогадованя важна, же бизме могли лєпше розумиц терашньосц и одредзиц будучносц. Руснаци научели вельо того, и од вас ми припаднїки других заєднїцох можеме учиц. Найобразованша сце заєднїца у Сербиї, маце барз добре поставену институционалну инфраструктуру, добре зложени институциї у обласци култури, образованя, информованя, службеного хаснованя язика и писма, и можеце барз живо и динамично витворйовац числени задатки котри пред припаднїками вашей заєднїци поставени – поручел Томислав Жиґманов.
