РУСКИ КЕРЕСТУР – Здруженє ремеселнїкох и приватних поднїмательох, вчера у Майсторским доме, отримало Рочну скупштину на хторей, попри членох Здруженя, присуствовал и секретар Месней заєднїци, Михайло Пашо.
На Скупштини були присутни вецей як 30 члени, предводзел ю предсидатель Здруженя Владимир Емейди, а по традициї, такой на початку, з минуту цихосци дата чесц членом хтори ше упокоєли у прешлим року.
У предлуженю, спомнути прешлорочни найзначнєйши активносци Здруженя як и роботни акциї на отримованю и адаптованю майсторского дому, а визначени и даскельо орґанизовани преподаваня и семинари, Майсторски бал хтори отримани на початку рока, пратки и други форми друженя. Ґу тому, до Управного одбору прияти и пейцме млади приватнїки, цо окреме значне кед слово о подмладзованю членства.
Прешлого 2025. року Здруженє нє достало финансийну потримовку од Општини, алє му уплацени обецани средства за означованє преслави з нагоди 190-рочнїци од снованя їх Здруженя, а хтора отримана 2024. року.
Кед слово о вкупних финансийох за 2025. рок, Здруженє зоз донацийох и членаринох, приходовало 245.000 динари, трошки адаптациї, трошки за порядне функционованє обєкту и за преславу рочнїци хтори уплацени влонї, виношели 220.000 динари, та Здруженє до наступного року вошло зоз 25.000 динарами на своїм рахунку.
После финансийного звиту, хтори пречитал член Дюра Сабадош, секретар Месней заєднїци Михайло Пашо присутних здогаднул на рижни активносци хтори у прешлим року поробени за валал, та ше по конєц Скупштини дискутовало преважно о тим.
На Скупштини спомнуте и же традицийни Майсторски бал будзе отримани на соботу, 31. януара, у ресторану „Три крунеˮ у Руским Керестуре, уходнїца будзе 2.900 динари, а присутних будзе забавяц домашнї бенд „Касиусˮ.
