КОЦУР – Рижни интересантни активносци през Дзецински тидзень запровадзовани предходних дньох за наймладших и у Предшколскей установи „Бошко Буха” – Оддзелєню „Герлїчка” у Коцуре.
Традицийну манифестацию Дзецински тидзень ше того року отримує под мотом „Же би дзеци щешлївши були: любов, почитованє, а нє сила!”, и шицки отримани активносци присподобени тей теми.
У „Герлїчки” виховательки наймладших упознали з правами дзецка, бешедовали о любови и почитованю, а днї пошвецели друженю. Прешейтали по валалє, упознали их з важнєйшима установами у Коцуре – Основну школу, Пошту, Домом здравя, Домом култури, Библиотеку, Етно-клубом, як и Добродзечним огньогасним дружтвом Коцур. Днї прикрашовали и зоз танцом и шпиваньом дзецинских шпиванкох.
Нащивели и Ґеронтолоґийни центер, правели дарунок товаришом, бавели ше с пластелином, глїнамолом, рисовали по асфалту, уживали у приповедкох, сликовнїцох и шпиванкох, а участвовали и у спортско-змагательних бавискох.
Наймладших нащивела и писателька за дзеци воспитачка у пензиї Чедиславка Попович, запровадзели и активносци з родичами, а була и акция предаваня колачох. През цали тидзень у оводи отримана и гуманитарна акция под назву „Дзеци дзецом”.
