Русиново когуцики и пионире бавели процив Вербащаньох

автор А. Медєши
373 Опатрене

РУСКИ КЕРЕСТУР – После жимскей павзи, когуцики и пионире Фодбалского клубу „Русинˮ того викенду, у Спортскей гали, започали свою полусезону зоз одбавеним приятельским стретнуцом процив своїх парянкох зоз ЦФК Вербас. У трох змаганьох побиду однєсол Вербас, а у єдним Русин.

У першим стретнуцу наступели наймладши, дзеци 1. и 2. класи хтори од Вербащаньох страцели зоз 3:0, а наступели у составе – Давид Еделински, Тони Сивч, Лука Зелич, Андрей Надь, Филип Бурчан, Страхиня Кршич, Урош Йолич, Михайло Шомодї, Стефан Такач, Дориян Попович, Лука Тасич и Марко Еделински. Тренер Деян Йолич.

Стретнуце у хторим наступели дзеци 3. класи, могло би ше повесц же було и найинтересантнєйше понеже ше лєм тей екипи удало принєсц побиду свойому клубу, а зоз резултатом 5:4 за Русин. У тей екипи наступели – Давид Колошняї, Тони Надь, Даниєл Фейди, Иван Надь, Кристофер Дудаш, Йован Бошкович, Давид Гарди, а у їх екипи бавели и два дзивчата зоз 4. класи – Николина Гарди и Клара Блаґоєвич.

Шлїдуюци на терен вишли дзеци 4. класи, хтори од госцуюцей екипи були поражени з резултатом од 8:7, а наступели у составе – Андрей Виславски, Алексей Виславски, Тони Колошняї, Ален Бики, Дарко Еделински, Ерик Русковски. Екипа була помоцнєна и зоз даскелїма старшима хлапцами зоз 5. и 6. класи, а то були – Алекс Цвайґ, Марко Илич, Тадей Виславски, Патрик Варґа и Исак Новта.

На концу наступели вєдно дзеци 5. и 6. класи понеже их було у меншим чишлє. Вони нaступели у составе – Алекс Цвайґ, Никола Планчак, Дюла Фаркаш, Марко Илич, Єлисей Пап, Тони Орос, Лука Стойков, Тадей Виславски, а бранєл им ґолман зоз 4. класи Алексей Виславски. Над тоту екипу госци однєсли побиду зоз резултатом од 6:3.

Шицки штири стретнуца судзел предсидатель Фодбалского клубу „Русинˮ Тихомир Медич, екипи предводзел тренер Зденко Шомодї, а окремне подзекованє заслужує управнїк Спортскей гали Драґан Ковачевич, хтори скорей каждого стретнуца приходзи вельо скорей же би гала була порихтана, зограта и обезпечена за змаганя.

ПОВЯЗАНИ ТЕКСТИ