КУЛА – У просторийох РКУД „Др Гавриїл Костельник” у Кули ше, внєдзелю 18. януара, у вельким чишлє позберали Руснаци и їх приятелє означиц Националне швето Руснацох.
На початку водителька конферанси Мария Стрибер, привитала предсидателя Дружтва Александра Планкоша, предсидателя Националного совиту Руснацох Стевана Сомочету, предсидателя Националного совиту Українцох Филипа Пронека, висшу совитнїцу за културу у Општини Кула Цвету Мучалицу, предсидателя Зруженя колонистох зоз Чарней Гори Жарка Поповича, хтори у кратких привитох повинчовали швето Руснацом.
Еуфемия Планкош, музична руководителька шпивацким ґрупом пречитала кратку историю наших 275. рокох на тих просторох и приселєнє, рецитовали Златка Чизмар и Александар Планкош, а на гармоники грал Йован Бошкович. Наступ мали наймладши чуваре рускей бешеди, дзеци цо ходза ґу наставнїци Тамари Хома на виборну наставу руского язика, Ивона Йоксович, Николина Орос и Димитриє Колошняї хтори шпивали и рецитовали. Зоз колядами и рускима писнями ше представела и мишана шпивацка ґрупа.
Дружтво того року чека велька преслава, бо наполнює 30. роки иснованя, та предсидатель Дружтва Александар Планкош дал звит роботи у прешлим року и плани за тот рок.
