Док читаце тоти шорики, Нови рок за нами. Гевта хвилька кед, з преходом з остатнього на перши дзень календара, велї здобуду фалшиви упечаток же ше дацо, у сущносци, пременї лєм прето же число на календаре иншаке. Психолоґия гутори же позитивне роздумованє и добра проєкция важни за сполньованє цильох. Заш лєм, новорочни винчованки часто поставаю лєм формалносц: „шицко найлєпше”, „вельо здравя, щесца и успиху”. Вигваря ше лєгко, скоро автоматски. А кельо ше, поправдзе, роздумує цо тоти слова знача? Цо то „шицко найлєпше”? Чи справди жадаме дакому лєпши и правдивши живот, лєбо лєм протоколарно закончуєме бешеду?
Исто важи и за „щешлїви Нови рок” – у морю ошмихох и славя, ридко хто жада же би му було исто. Шицки жадаю лєпше, гоч уж час укаже чи поправдзе лєпше було. Зато би було щиро поставиц себе питанє: „цо я жадам од того року?” И цо ище важнєйше – „цо сом порихтани зробиц же би ше то случело?” Як стариме, жаданя ше меняю. Од бавискох и симпатийох, прейґ роботи, пенєжох и мира у фамелиї, сцигуєме до гевтей хвильки кед здравє постава найвекше жаданє. Нашо и здравє наших найблїзших. Теди поставаме одроснути. Пред нами нови круг Жеми коло Слунка, котри почина зоз жиму и трошками. Жичим най нам януар нє будзе найдлугши мешац у року. Же бизме мали струї, зогриванє и пенєжи то плациц. Най хори на интервенцию нє чекаю мешацами, же би дохтор препатрал пациєнта длужей як цо патри до компютерского екрану дзе пополнює административни обовязки, и же би нам дохторе специялисти нє одходзели зоз кратким порученьом же ше „нє буду врацац”. Младим жадам же би витворели цилї, алє най нє забуду же постоя вредносци котри ше нє купує. Занятим же би робели роботу котру любя, без политичних и других прицискох, и же би дочекац пензию нє була лєм статистична вироятносц. Пензионером жадам векши пензиї и нїзши цени, без илузийох же им дахто дацо „дарує”. Парастом же би ше их власци здогадли и кед нє виберанки, же би без партийней кнїжочки могли жиц од своєй роботи и же би були почитовани, бо нас вони кармя. Як дружтву, жадам нам одвичательносц. Же би гевти котри виновати одвитовали. Же би ше криминалцох нє наволовало патриоти, а студентох криминалци. Же би медиї информовали, а нє манипуловали. Же би одвичательни одвитовали и за паданє стрехи на Гайзибанскей станїци у Новим Садзе, як и за кажде друге нєдїло котре остало без епилоґу. Же би у гарештох нє закончовали гевти котри глєдаю правду, алє гевти котри ю поґажели. Же би закон бул єднаки шицким, починаюци од державного верху. И же би ше розписало виберанки – шлєбодни и фер, без виберанкових манипулацийох, приводзеня гласачох з боку, насельованя нєпостояцих людзох по трафо-станїцох котри ту „биваю” лєм на дзень виберанкох и нїґда после.
Бо одвичательносц почина у хвильки кед ше правдиву волю гражданох пречита. Знам же кед ше шицко тото витвори, дзепоєдни нє буду щешлїви. Алє, за пременку, любел бим у тим року буц на тим другим, щешлївим боку. Щешлїви Вам Нови 2026. рок!
Становиска у тим тексту виключно авторово и нє вше одражую ушорйовацку политику новинох „Руске слово”.