Школяре ознова у лавкох ОШ „Светозар Милетич”

автор Ол. Русковски, Фото vrbas.net
280 Опатрене

ВЕРБАС – Основна школа „Светозар Милетич” у Вербаше ознова отворена за наставу, после законченей реконструкциї вредней 700.000 швайцарски франки.

Школа, у котрей наставу провадза вецей як 700 школяре, реконструована од фундаментох по закрице. Роботи облапяли замену паркетох, дзверох и облакох, реконструкцию санитарних ґузлох, нукашнїх и вонкашнїх мурох, вибудову новей вонкашнєй фасади, замену комплетних инсталацийох и вибудову нового закрица. Роботи часточнє финансовани з општинского и покраїнского буджету, а комплетна замена дзверох и облакох финансована у сотруднїцтве Влади Сербиї и Влади Швайцарскей Федерациї.

З нагоди святочного отвераня школи, после законченей реконструкциї, школяре и професоре пририхтали програму котрей присуствовали предсидатель Општини Вербас Предраґ Роєвич, заменїца предсидателя Општини Тияна Алексич, предсидателька Скупштини општини Саня Жиґич, член Општинскей ради Срдян Станич, як и числени бувши професоре школи, родичи и школяре.

У вербаскей Основней школи „Светозар Милетич” рошнє число школярох, а найвецей ма и занятих, вкупно 80. По словох єй директора Славиши Лубурича, то перша велька реконструкция после 37 рокох, и окрем того же школа обновена, поставене и нове зогриванє на ґаз. На концу подзековал локалней самоуправи на потримовки, шицким котри були уключени до реконструкциї, як и численим приятельом школи котри им, як визначел Лубурич, помагали у предходним периоду.

ПОВЯЗАНИ ТЕКСТИ