РУСКИ КЕРЕСТУР – Националне швето Руснацох у Сербиї традицийно означене и у образовних установох у Руским Керестуре. Так, у Дзецинскей заградки „Цицибан” ПУ „Бамби”, швето означене на сам дзень, 17. януара.
На пригодни способ о тей теми дзецом старшей и пририхтуюцей предшколскей ґрупи бешедовали воспитачки Наташа Настасич, Ксения Вучкович и Наташа Варґа.


На проєктору дзецом пририхтали кратки есей т.є. видео-запис о Руснацох, а потим и бешедовали одкаль ше, як и кеди приселєли. Як дакеди жили, яки єдла пририхтовали, як випатрала руска хижа, давне облєчиво и подобне, а пририхтали и малу виставу стародавних предметох. Тиж так дзеци рисовали и руску заставу и герб, а вчера, 20. януара, нащивели и музейну збирку у будинку Замок.
