ШИД – Зоз пригодну програму у Руским доме у орґанизациї КПД „Дюра Киш“ вчера, 16. януара означене националне швето Руснацох.
После державней гимни „Боже правде“ и шветочней шпиванки Руснацох „Браца Русини“ хтори одшпивала Старша мишана шпивацка ґрупа дружтва у провадзеню оркестра, тема преслави була 100 рочнїца од снованя Руского просвитного дружтва.
Спомнуте дружтво основане 8. януара 1926. року и зохабело моцни шлїд у културно-просвитним живоце Руснацох у Шидзе и ширше.
О активносцох спомнутого дружтва присутних поинформовали школяре Лука Цирба, Йована Петрович и Стефан Ркман и то през роботу хорскей и драмскей секциї и їх активносци.
У музичней часци програми зоз класичну музику на клавиятури наступел школяр другей класи Основней музичней школи „Филип Вишнїч“ у Шидзе Коста Гнатко и школярка трецей класи Ґимназиї „Сава Шуманович“ Сара Єґдич, а на концу Старша шпивацка ґрупа одшпивала „Дай нам Боже добри час“.
После официялней програми, друженє предлужене на коктелу дзе ше шпивало и танцовало.
