У Коцуре означене Националне швето Руснацох

автор Ол. Русковски
148 Опатрене

КОЦУР – У орґанизациї Подручней канцелариї Националного совиту Руснацох у Коцуре и КУД „Жатва” вчера вечар, 16. януара, означене Националне швето Руснацох.

Координаторка Подручней канцелариї у Коцуре Мелания Мали на початку святочней програми привитала присутних котри пришли означиц тото швето, значни Дзень за руску заєднїцу. Програма почала зоз химну „Боже правде” и святочну шпиванку Руснацох „Браца Русини”.

Шлїдзели змисти котри пририхтала Литературна секция „Нашо крочаї” КУД „Жатва”, та так Мария Горняк на початку тей часци пречитала писню, а потим и гуторела поему зоз богатей литературней творчосци Руснацох. Микола Шанта бешедовал о историї Коцура, о тим як випатрал Коцур скорей присельованя Руснацох, як и о часу после їх присельованя, як валал достал мено, и о велїх других интересантносцох зоз прешлосци Коцура.

У часци програми котра шлїдзела школярка Основней школи „Братство єдинство” Катарина Штефанко пречитала свой напис о Руснацох на териториї Сербиї, а менторка єй наставнїца руского язика Снежана Шанта. На концу Михайло Будински одшпивал даскельо авторски руски шпиванки, та програма закончена з музику, у веселим розположеню.

По законченей програми, присутни нащивителє вєдно зоз учашнїками остали на друженю у Подручней канцелариї, зоз закуску и ошвиженьом. Предлужели ше приємни хвильки у бешеди о Руснацох, їх присельованю на тоти простори и богатей историї нашого народу.

ПОВЯЗАНИ ТЕКСТИ