СРИМСКА МИТРОВИЦА – У рамикох Централней преслави националного швета Руснацох у Шветочней сали Музичней школи „Петар Кранчевич” у Сримскей Митровици отримани Усни новини Новинско-видавательней установи „Руске слово” .
Подїя на хторей читательскей публики представени виданя и дїялносц нашей Установи отримана з нагоди 100-рочнїци „Руских новинох” хтора означена влонї и 80-рочнїци НВУ „Руске слово” хтора ше полнї того року.
На Усних новинох хтори були барз добре нащивени з домашню публику, алє и з численима нашима читателями з других местох дзе жию Руснаци, бешедовали представителє НВУ „Руске слово” хтори представели цали спектер виданьох и медийней дїялносци Установи.
Понеже учашнїкох и госцох спред домашнього Дружтва Руснацох Сримскей Митровици привитал Владимир Балащак, директор НВУ „Руске слово” др Борис Варґа представел шицки публикациї и дїялносци хтори през остатнї 80 роки розвила Установа, од найдлуговичнєйших – тижньових новинох „Руске слово”, прейґ мешачних виданьох и кнїжкох, по найновши, диґитални формати як цо Аґенция Рутенпрес.
Главна и одвичательна редакторка новинох „Руске слово” Олена Планчак Сакач представела мисию наших новинох на очуваню националного идентитету, язика, култури и традициї рускей заєднїци, окреме акцентуюци континуитет хтори „Руске слово”, скарбує шлїдом дакедишнїх „Руских новинох”, док редакторка рубрикох Нашо места и Духовни живот Олена Папуґа и дописователь „Руского слова” зоз Шиду и других сримских местох Владимир Дїтко бешедовали о конкретних и каждодньових аспектох новинарскей роботи на терену. Редакторка Дзецинского часопису заградка Ясмина Дюранин бешедовала о способе на хтори ше тот наш вично млади часопис хтори шицким нам найчастейше перши контакт зоз писаним словом по руски намага тримац крочай з часом и препознавац смак наймладшей публики.
Редакторка Аґенциї Рутенпрес Вероника Вуячич потолковала способ роботи того дньового информативного медия яки нє маю анї вельо векши меншински заєднїци. Як визначела, за тоту нєлєгку роботу у хторей каждодньово уключени шицки дописователє „Руского слова”, найважнєйше нєпреривно буц у контакту з людзми на терену и на жридлу достац информацию хтора ше преточи до вистки.
У густей цалодньовей програми Централней преслави Националного швета Руснацох у Сримскей Митровици, за отримованє Усних новинох Руского слова було наменєне лєм годзину та за тот час могло лєм дотхнуц шицки теми хтори интересую публику, алє и новинарох. Медзитим, и з тей нагоди потвердзене же припаднїком нашей заєднїци, насампредз у штредкох хтори нє найвекши кед слово о числу Руснацох, таки сходи вельо знача и дзечнє на нїх участвую.