Вистава „Мальованє сримскей цихосци” подобовей уметнїци Ясни Арбанас

автор И. Сабадош, фото: В. Вуячич
144 Опатрене

СРИМСКА МИТРОВИЦА – Пред початком Шветочней академиї у Сримскей Митровици у голу Театра „Добрица Милутинович” отворена вистава под назву „Мальованє сримскей цихосци” подобовей уметнїци Ясни Арбанас з того городу.

Виставу, як традицийну провадзацу програму каждей Централней преслави Националного швета Руснацох отворел директор Заводу за културу войводянских Руснацох Саша Сабадош, а деталї з биоґрафиї Ясни Арбанас представел Звонко Беднар спред Дружтва Руснацох Сримскей Митровици. Як гварел, слово о длугорочней активней членїци Дружтва, уметнїци хтора по фаху правнїца а по вокациї поетеса, рецитаторка и малярка чия робота и творчосц замеркована и припозната и звонка родного городу и локалней уметнїкей сцени.

О подобовей творчосци Ясни Арбанас у хторей доминую пейзажи и мертва природа, насампредз мотиви венчикох з осушеного квеца, бешедовала историчарка уметносци Мария Вукайлович, хтора и авторка двоязичного пригодного провадзацого каталоґу вистави „Мальованє сримскей цихосци”. Як ефектно заключела, подобово роботи Ясни Арбанас то лирска поезия на малюнкох, хтора источашнє виражує шицки єй творчи сензибилитети.

Сама авторка, родом з фамелиї Димитришин, подзековала орґанизатором же достала нагоду буц часц Централней преслави Националного швета Руснацох, а виставу пошвецела памятки на своїх предкох од хторих нашлїдзела завит нє забуц свойо руски коренї и походзенє.

ПОВЯЗАНИ ТЕКСТИ