ВЕРБАС – Городски пияци зоз хторима руководзи ЯКП „Комуналєц” у Вербаше робя два раз у тижню – стредами и соботами, у Змаєве вовторками, а у Коцуре пиятками.
Гоч куповна моц трошительох у остатнїм року ослабла, стреду на пияцу у Вербаше, и попри тим же падал диждж, купцох було.
„Пияц отримую старши купци, прето же младши частейше ходза до маркетох. Нашо муштериї найчастейше пензионере. Дараз зме предали шицко цо зме принєсли на пияц, а тераз то уж чежше”, гварела Мария Жаркович.
У тим периодзе найвецей ше купує овоц и желєняву. Желєну шалату мож купиц за 40 динари, звяска младей цибулї кошта од 50 по 100 динари, а шицки тарґовци даваю тунше кед ше бере векше количество. Найвекше вдеренє на буджет гражданох пре значне звекшенє ценох основних намирнїцох, меса, цибулї, кромпльох и вайцох.
За продуковательох и тарґовцох на пияцу у Вербаше, окрем порядних муштерийох, барз важне и же цена закупнїнох уж роками иста. Резервовац пиячни простор зоз хторим руководзи ЯКП „Комуналєц” мож по конєц мешаца. Контракти ше подписує на рок, по старих ценох. У Вербаше то мож покончиц стреду и соботу у просторийох пиячней управи од 6 по 14 годзин. У Змаєве ше контракти буду заключовац на вовторок, 21. марца, а у Коцуре на пияток, 24. марца у просторийох Добродзечного огньогасного дружтва.