На 57. Драмским мемориялу Петра Ризнича Дядї одбавена и представа за дзеци „Важне писмо”. Написал ю Михайло Ковач, а одбавели ю дзеци з Руского културно-уметнїцкого дружтва „Др Гавриїл Костельник” з Кули.

Весела пейцчлена ґлумецка екипа зоз Кули на Драмским мемориялу пред школярами керестурскей школи одбавела представу „Важне писмо”. На интересантни способ им указане цо у тим писму пише и прецо воно важне.

Режисерка Нада Лендєр улоги у представи подзелєла до двох ґрупи: у єдней ґрупи дзеци котри любя природу и стараю ше же би животни штредок бул чисти, та за собу збераю шмеце. У другей ґрупи дзеци котри ше нє стараю о еколоґиї, та прето приходзи до їх зраженя.

У представи ґлумели Яна Лукета, Димитриє Колошняї, Миа Вуїч, Ирина Ковач и Николина Орос. Шицки гваря же ше им барз пачело ґлумиц у представи. А дознали зме и же Ирина Ковач и Николина Орос ґлумели безобразни дзеци. Їх задаток бул же розруцовали квеце по сцени, одґуровали добри дзеци, вилєговали ше и правели нєшор. И попри тим, уживали док пририхтовали представу, гоч им досц чежко було научиц цали текст по руски. Обидвом ше пачело кед ше на концу шицки вєдно поклонєли публики и кед достали вельки аплауз.

Яна Лукета, Димитриє Колошняї и Миа Вуїч ґлумели дзеци котри любя кед им шицко чисте, кед маю у своїм окруженю вельо квеца котре дзечнє залїваю и стараю ше о нїм. Шицке шмеце одруцаю до канти, а нєдобрим дзецом жадаю потолковац же би ше требали иншак справовац.

Публика барз крашнє прияла представу и похопела же то борба добра и зла и кед на концу добре победзело, наградзела ґлумцох зоз огромним аплаузом.

Гоч ше нє случує часто же ше дзецинску представу бави у физкултурней сали, ґлумци ше одлично знашли у новим просторе.

Сценоґрафию за представу обдумали Янко и Нада Лендєрово, сцену помогнул порихтац Ярослав Ковач, суфлер була Амалия Ковач, а за музику бул задлужени Янко Лендєр.