РУСКИ КЕРЕСТУР – После написох застараних гражданох и еколоґийних здруженьох на дружтвених мрежох о интензивним вицагованю води зоз каналу ДТД, медзи иншим и у Руским Керестуре, прецо пришло до наглого опадованя уровня води, Явне водопривредне подприємство „Води Войводини” сообщело же застановене наводньованє на часцох Гидросистеми Дунай-Тиса-Дунай.
У сообщеню наведзене же подла гидролоґийна ситуация и скоро рекордно нїзки водостої у цалим злїву Дуная загрожую водни режим Гидросистеми ДТД, та на даєдних часцох наводньованє дочасово застановене, а тиж ше апелує и на шицких гражданох и хасновательох же би рационално хасновали воду зоз беґельскей мрежи. Додава ше же пре високи температури и сушни период, очуванє стабилносци водного режиму од ключного значеня, же би ше нє загрожело биолоґийни минимум, рошлїнски и животиньски швет.
Наводзи ше же ЯВП „Води Войводини” у прешлим периодзе анґажовало шицки капацитети хтори були на розполаганю же би ше обезпечело додатни количества води у беґельскей мрежи. Медзитим, уровень води у беґельох ше заш лєм ище додатно зменшал та ше мушело застановиц наводньованє на одредзених часцох беґелю.
У сообщеню наведзене и же хаснователє води на писани способ обвисцени же ше наводньованє дочасово застановює, а тоти мири буду на моци покля ше водостої нє враца на проєктовани роботни уровень за наводньованє. Надпомнуте же шицки фахово служби ЯВП „Води Войводини” максимално анґажовани, каждодньово провадза стан на терену и же нєрационалне и нєлеґалне вицагованє води будзе строго санкционоване.