РУСКИ КЕРЕСТУР – По першим уписним кругу, 9. и 10. юлия, до Штреднєй школи „Петро Кузмяк” з Руского Керестура, ше на три напрями уписали 49 школяре. Од того до Ґимназиї на руским наставним язику 11 школяре, до оддзелєня Ґимназиї на сербским язику 19, а до фаховей школи на напрям туристични технїчар тиж 19 школяре.
Характеристики тогорочного упису же ше попри школярох з Керестура до рускей Ґимназиї уписали и тройо зоз Коцура, цо давно нє було, а з того места тройо ше уписали и за туристичного технїчара.
Вкупне число уписаних школярох того року досц менше як влонї, кед була и векша ґенерация и школярох по ИОП-у хтори вредза за три места. По словох директорки Школи Хелени Пашо Павлович, число уписаних школярох ище нє конєчне понеже будзе и други уписни термин 12. юлия, а кажди рок ше случує и преписованє школярох з єдней до других школох.
Источашнє у керестурскей Школи почал и упис до дому школярох хтори будзе тирвац по 17. юлий. Интернат ма 70 места, перши два днї ше уписали 15 школяре з першого року, а єст и други уписни рок у авґусту кед ше векшином уписую школяре висших класох.