НОВИ САД – Роботне цело за науку Националного совиту Руснацох, як памятку на отца др Романа Миза, котри ше упокоєл 13. новембра 2017. року, орґанизовал округли стол, пошвецени його животу и дїлу.
Округли стол отримани вчера, 13. марца, у Заводзе за културу войводянских Руснацох, и почал зоз молитву. Отец др Роман Миз бул священїк, новинар, редактор, историчар, прекладатель, библиоґраф, професор, културни и явни роботнїк, а то лєм найзначнєйши обласци творчого анґажмана новосадского пароха.
О живоце и дїлу о. Романа Миза уводне викладанє мал преосвящени владика Георий Джуджар, апостолски еґзарх за грекокатолїкох у Сербиї. Вон, медзи иншим, гварел:
– Плод його интелектуалней творчосци числени кнїжки на рижни теми хтори нам охабел. Бул приклад священїка хтори знал вихасновац розположиви ресурси и средства за духовне служенє и интелектуалну творчосц, бо попри обовязкох духовного пастира, сциговал и шицко друге – визначел кир Георгий Джджар.
Кратку биоґрафию о. Миза висловел Михал Рамач, хтори бул и модератор округлого столу, а здогадованя на новосадского пароха висловели о. мр Михайло Малацко и о. Владислав Варґа.
Дюра Латяк бешедовал о Мизовей новинарско-публицистичней роботи, цали историят сотруднїцтва од шейдзешатих рокох та по конєц, а Микола М. Цап о церковней, културней и науковей публицистики о. Миза, як и о його прекладательстве. Биланс литературней продукциї о. Романа Миза чишлї вецей як 80 наслови на руским, українски, сербским, горватским и мадярским язику.
Др Дюра Гарди бешедовал о своїх контактох зоз паноцом Мизом, о його богатей библиотеки, о чуваню нам важних историйних кнїжкох и рочнїкох новинох. Учасц на округлим столє вжали и академик Юлиян Тамаш и др Янко Рамач, хтори ше здогадли на свойо плодни контакти зоз о. Мизом.