Найлєпше лєто потераз

автор мзг
1.6k Опатрене

Виктор Надь з Руского Керестура того лєта дожил и видзел велї нови ствари, понеже вецей як мешац пребувал у далєкей Канади, прето му тот розпуст бул барз возбудлїви и найлєпши потераз.

Вєдно зоз свою бабу Меланку, 11-рочни Виктор нащивел Киченер, город у Канади у хторим биваю його бачи Владо, тета Лидия и братняци Алекс и Роберт.

– Першираз сом лєцел на авиону и то ми було барз интересантне. Кед зме першираз полєцовали, дакус сом ше бал, алє после сом ше звикнул. Драга була длуга. Кед ше полєцує и злєцує шицко барз фино видно през облак – приповеда нам Виктор свойо дожица.

У Канади бул на велїх интересантних и нєзвичайних местох, а гвари же ше му найбаржей пачело кед були у „African Lion Safari”.

– То як зоолоґийна заграда, з тим же животинї нє заварти, алє пущени, а людзе иду на автох. Єден маймун ше нам випендрал на кров. Були зме и на вельким водопаду, на Нияґарох. Там єст и около красни ствари. Тиж так, барз ше ми пачело и у вельким аквариюме, дзе єст скоро шицки файти рибох, и вельки, и мали. Супер було кед штири-пейц айкули ишли коло нас – додава Виктор.

У Канади упознал и нових пайташох зоз сушедства, зоз хторима бавели фодбал, а зоз братняком Алексом ше часто вожели на тротинетох.

– Кед зме ше бавели вонка, перше сом даєдни слова нє розумел, алє понеже зме найчастейше бешедовали о истих темох, научел сом. У Канади сом дакус увежбал анґлийски язик, а братняци руски. Любел бим пойсц ище дакеди, гоч и на длужей, як и тераз, алє заш лєм нє занавше, бо ми у Керестуре шицки, а и ту векша шлєбода, як там – припознал нам Виктор на концу.

ПОВЯЗАНИ ТЕКСТИ