ДЮРДЬОВ – У дюрдьовскей Основней школи „Йован Йованович Змай” того року осму класу закончую седемдзешат двойо школяре, медзи нїма и седмеро з руского оддзелєня.
На пияток, 1. юния, з початком на 19 годзин, у Школи будзе маломатурски вечар, а 18., 19. и 20. юния маломатуранти буду покладац закончуюци испит з мацеринского язика, математики и комбиновани тест.
Прешлого тижня у центре Дюрдьова, традицийно у облаку Народней библиотеки, виложени фотоґрафиї тогорочних маломатурантох зоз шицких трох класох дюрдьовскей Школи. У руским оддзелєню основне школованє закончую три дзивки и штирме хлапци – Єлена Мудри, Марина Михальовски, Катарина Бесерминї, Владимир Горняк, Борис Хромиш, Иґор Салак и Иван Кухар. Класни старшина им Мария Самарджич, наставнїца руского язика, а учителька им була Єлена Салаґ.