ПЕТРОВЦИ (РЕПУБЛИКА ГОРВАТСКА) – Централна манифестация култури Руснацох Републики Горватскей (РГ) „Петровски дзвон 2018”, 45. по шоре, почина нєшка у Вуковаре и Петровцох, а будзе тирвац по нєдзелю, 3. юний.
Нєшкайша програма почина у Етноґрафскей збирки у Петровцох дзе будзе приказани обичай рубаня майского древа, а потим планована културна програма и друженє.
На ютре, 2. юния, до 10 годзин очекує ше приход предсидателя Горватского Собору Ґордана Яндроковича до готелу „Лав” у Вуковаре, дзе потим будзе отримана и Святочна схадзка Союзу Русинох Републики Горватскей з нагоди 50-рочнїци роботи.
У пополадньових годзинох, на 18 годзин, програма „Петровски дзвон 2018” будзе предлужена у Петровцох, з отвераньом вистави, промоциями кнїжкох и лїтописа „Думки з Дунаю”, а у музично-литературним вечаре буду означени 50-рочнїца Союзу Русинох РГ, 40 роки Етноґрафскей збирки и 50 роки КУД „Осиф Костелник” з Вуковару. У програми буду участвовац писателє Русинох РГ, Културного дружтва „Русинох” з Винковцох, КУД Руснацох з Осиєку и КУД „Осиф Костелник” з Вуковару.
На нєдзелю, 3. юния, програма почнє зоз Архиєрейску Службу Божу у Петровцох, а потим ше у Доме култури отрима Смотра музичней и фолклорней творчосци дзецох – „Петровски дзвончок 2018”. Учашнїки буду члени дзецинских ансамблох Руснацох РГ зоз Вуковару, Петровцох, Миклошевцох, Основней школи „Антон Бауер” з Вуковару, госци зоз Канїжи и госцуюци ансамбли зоз вуковарско-сримскей жупаниї.
Истого дня, на 15 годзин, у Школи почнє Смотра музичней и фолклорней творчосци Руснацох РГ „Петровски дзвон 2018” на хторей буду участвовац ансамбли Руснацох РГ зоз Риєки, Заґребу, Винковцох, Райового Села, Осиєку, Вуковару, Петровцох, Миклошевцох, ансамбли националних меншинох XII виборней єдинки Австрийци и Нємци, Поляци, Роми, Русиянє, Українци и Євреє, а як госцуюци ансамбл наступи КУД „Ловро Єжек” зоз Мариї Бистрици. На 20 годзин цаловечарши концерт отрима КУД „Тарас Шевченко” зоз Дюрдьова.
Тогорочна 45. манифестация отрима ше под Високим покровительством Горватского Собору и Совиту за национални меншини РГ, а зоз финансийну потримовку Вуковарско-сримскей жупаниї, Городу Вуковар и Општини Боґдановци.