НОВИ САД – Манифестация „Новосадска яр” будзе отворена нєшка на першим поверху СПЕНС-а. На тогорочней 28. манифестациї ше представя велї продукователє квеца, опреми за гортикултуру, меду, здравей поживи, сувенирох и продуктох ручней роботи.
Того року, окрем узвичаєних змистих, нащивительом ше представи Здруженє „Инжинєре защити животного штредку” хтори орґанизую акцию замени старого паперу за саднїци квеца лєбо древка. Хто принєше 10 кґ старого паперу достанє саднїцу квеца, а за 60 кґ древка. Стари папер до пиятку мож принєсц од 8 до 20 годзин, а на соботу, 24. марца, од 8 до 12 годзин. На їх штанду годно достац и основни информациї о значносци рециклованя и о рижних способох защити животного штредку.
Ґу тому, тема тогорочней манифестациї и значносц пребуваня у природи на менталне и физичне здравє людзох. Прето орґанизовани фахово и науково преподаваня и представянє роботи цивилних орґанизацийох хторим у фокусу тоти активносци, як и интерактивни роботнї за дзеци и младих.
На „Новосадску яр” мож присц кажди дзень од 8 до 20 годзин, а уход безплатни. Манифестацию орґанизує новосадске здруженє „Рух горякох Нового Саду”, а будзе тирвац по 24. марец.