Централна преслава нашого швета найвироятнєйше 21. януара

автор дюв
1.3k Опатрене

НОВИ САД/СУБОТИЦА – У Заводзе за културу войводянских Руснацох у Новим Садзе вчера, 16. септембра, отримана друга схадзка Орґанизацийного одбору за Централну преславу Националного швета Руснацох у Сербиї нарок у Суботици, на хторей бешедоване о орґанизациї и програми преслави.

Як порадзене, Централна преслава би мала буц отримана 21. януара (нєдзеля) 2018. року у Городскей хижи у Суботици. Потвердзене же у „Велькей сали” будзе Централна академия, док други програми буду у других просторох Городскей хижи – у „Вестбилу” и „Белавей сали”. Академия би мала почац на 20 годзин, а вироятно ю директно будзе преношиц и руска редакция РТВ.

Як поведзене на схадзки, концепция Централней преслави Националного швета у Суботици ше будзе досц розликовац од дотерашнїх програмох, понеже плановане унєсц одредзени вименки и новосци.

На схадзки винєшени велї идеї, мена виводзачох, насампредз зоз Суботици, понеже Дружтво Руснацох у Суботици и домашнє Централней преслави, алє програмна концепция будзе утвердзена познєйше.

На чолє з його предсидательку Олену Планчак Сакач, на схадзки присуствовали члени Орґанизацийного одбору Иван Гарди, Оля Карлаварис, Мария Тот, Мирослав Пап, Владимир Надь Ачим, Татяна Колєсар Ґвоїч и Анамария Ранкович, котра и о.д. директора Заводу за културу войводянских Руснацох, установи хтора главни ношитель орґанизациї Централней преслави нашого швета.

 

 

ПОВЯЗАНИ ТЕКСТИ