СЕРБИЯ – За доставанє ваучерох од 5 000 динари за одпочивок у Сербиї гражданє ше можу приявиц од 1. юлия, а ваучери годни хасновац од 1. авґуста по конєц новембра.
– На пондзелок розпишеме явну поволанку власнїком готелох и туристичних обєктох, на хтору би мали одвитовац за осем днї. После того почнє приявйованє гражданох котри маю право на ваучери, а то шицки пензионере, нєзаняти, заняти котри маю меншу плацу од 60 000 динари, та воєни инвалиди – гварел министер туризму, тарґовини и телекомуникацийох Расим Ляїч.
Условиє за доставанє и хаснованє ваучеру од 5 000 динари и же би гражданє на одпочивку препровадзели пейц днї (пейц ноцованя), а вони нє буду важиц у туристичних обєктох у найвекших городох – Беоґрадзе, Новим Садзе, Нишу и Краґуєвцу. Приявиц ше мож у Пошти, а тим котрим буду одобрени, ваучери Пошта будзе посилац на домашнї адреси.