НОВИ САД – Потераз ше зоз Войводини крев мушело посилац до Беоґраду, понеже лєм там єст апарат хтори озрачує продукти креви, а од вчера таки апарат почал робиц и у Заводзе за трансфузию креви Войводини.
Тот апарат ма широки спектер применьованя, а потребни є насампредз за пациєнтох хтори примаю крев, пациєнтох котри маю нашлїдне поремеценє имуней системи, гевтих котри маю даєдни файти малиґних хоротох, пациєнтох при котрих ше розвило имуне поремеценє як пошлїдок третманох зоз одредзенима лїками, лєбо пресадзованя шпику, матичних клїтинкох итд.
Зоз Покраїни за набавку того апарата опредзелєни 16 милиони динари, а на урядовим пущаню до роботи присуствовала покраїнска секретарка за здравство, социялну политику и демоґрафию Весна Копитович.
– Правилне лїченє пациєнтох зоз озраченима продуктами креви у предтрансплантацийним периодзе, та периодзе после трансплантациї, зменша можлївосц компликацийох и звекша квалитет лїченя – гварела Копитовичова.