Войводянє найчастейше умераю од хоротох кревоцеку и туморох

автор сен
1k Опатрене

НОВИ САД – На вчерайшей схадзки Покраїнскей влади бешедоване о здравственим стану гражданох, конкретно од хторих хоротох найчастейше охорюю и умераю, же би ше на основи податкох направело програми за вчасне одкриванє хоротох.

Податки Институту за явне здравє Войводини з 2013. року указую же найчастейши кардиоваскуларни хороти, тумори, хронїчни хороти орґанох за диханє и хороти мускулово-косцовей системи. Оценєте же морталитет у Войводини високи, а найчастейши причини то хороти кревоцеку – 53,5 одсто и тумори – 23,1 одсто.

У наиходзацим периодзе Покраїнски секретарият за здравство предложи активносци з хторима ше унапредзи здравє и зменша охорйованє од кардиоваскуларних и малиґних хоротох. Ґу тому, оценєте же треба робиц на освидомйованю людзох о значносци здравого способе живота, физичней активносци и здравого костираня, наводзи ше у сообщеню.

На схадзки принєшене и ришенє о менованю доц. др Александра Раджека, специялисту общей гирурґиї-кардиогирурґиї, за директора Институту за кардиоваскуларни хороти Войводини у Сримскей Каменїци.

 

ПОВЯЗАНИ ТЕКСТИ