Початок школского року вше зоз собу приноши якеш чудне чувство. Нови початок, нови штредок и нови обецаня же „од того року шицко будзем учиц на час”.
И я єдна од тих цо закончела штредню школу того року, та можем повесц же сом за тоти штири роки научела вельо того, и нє, нє думам на тото цо зме учели (мушели учиц) на годзинох. Научела сом як найсц мотивацию кед ми ше нїч нє роби, як ше вибориц зоз трему, алє и кельо важни людзе хторих упознаме на тей штредньошколскей драги.
Прето, кед тераз починаш до штреднєй школи, або ци лєм початок школского року, ниа, даскельо совити як вихасновац тоти штири роки максимално.
1. НЄ МУШИШ ТАКОЙ ЗНАЦ ЦО СЦЕШ
Кед же ши ше уписал/а до ґимназиї, вироятно ци ше з часу на час опитаю „А цо будзеш после?”Кед нє маш одвит, то цалком окей. Даєдни школяре знаю од першого року цо сцу у будучносци, даєдни то похопя аж пред матуру, а даєдни пременя жаданє пейц раз. Нє треба же биш ше чувствовал/а подло кед нє знаш, алє треба же биш цо вецей робел/а на упознаваню себе, бо єдино так будзеш знац цо це наисце интересує (або нє).
А то нас водзи ґу шлїдуюцому совиту.
2. УКЛЮЧ ШЕ ДО ДАЧОГО ЦО НЄ ЛЄМ ШКОЛА
Кед достанєш нагоду участвовац у даякей секциї, проєкту, черанки, змаганю, кампу, волонтираню, або гоч хторей подобней активносци – прияв ше. Упознаш людзох хторих биш можебуц нїґда нє упознал/а, одкриєш даяки скрити талант за хтори ши анї нє знал/а же маш, або єдноставно будзеш мац приповедки хтори будзеш длуго преприповедовйовац.
На дружтвених мрежох ше барз вельо койчого понука, вешкина од того и цалком задармо, а знанє хторе ше достанє нє ма цену. Думам же важне даґдзе пойсц сам, дзешка дзе нїкого нє познаш, бо и то єдно окремне дожице за себе. Як особа хтора вихасновала вельо таки нагоди можем повесц же дакеди тото цо ше случело вонка з класи, останє найлєпша часц штреднєй школи.
3. НЄ ОХАБЯЙ ШИЦКО ЗА ПОСЛЕ
„Мам часу” єдна з найопаснєйших виреченьох при штредньошколцох. Мам часу за контролни, прияву, проєкт, факултет…, а вец одразу похопиш же конєц рока. Цо вецей будземе чекац одредзену хвильку, то вецей нагоди страциме. Дружтво нас прициска же бизме були совершени и мали даяки план за будучносц, алє у реалносци, шицки ше дакеди чувствуєме страцено. Даяки ствари нє можеме виплановац, алє кед виплануєш голєм тото цо можеш, гевто друге ше шицко намесци.
4. НЄ НАМАГАЙ ШЕ УКЛОПИЦ ПО КАЖДУ ЦЕНУ
Школа вельо лєгчейша кед коло себе маш дакого зоз ким ше можеш шмеяц на одпочивкох, подзелїц фриштик, або вєдно „панїчариц” пред контролним. Алє нє мушиш буц часц каждого дружтва. Нє меняй себе лєм же биш ше дакому пачел/а.
5. ДОПУЩ СЕБЕ ПОГРИШИЦ
Штредня школа єдно з перших местох дзе маме достаточно шлєбоди приношиц одлуки сами, алє и достаточно простору погришиц. Нє будзе кажди вибор добри, нє кажди пайташ останє пайташ, а анї кажди контролни нє прейдзе так як зме думали. Нє уда ше анї кажди план, алє то нє значи же нєт нагоди за дацо друге. Гришки то часц одрастаня, а даєдни зоз нїх будзеш познєйше паметац як лекциї хтори ши нє могол/а научиц анї зоз єдней кнїжки.
Кед сом почала до штреднєй школи, думала сом же тоти штири роки буду барз длугоки.
Тераз кед прешли, мам чувство же прешли барз швидко. Кед бим ше могла врациц на свой перши дзень, вироятно бим себе поведла же нє мушим шицко знац такой, же нє страшне погришиц и же нє треба же бим ше нервирала коло стварох на хтори нє можем уплївовац. На концу – нє паметам тото, алє людзох, шмих, путованя и перши вельки успихи.
Прето до нового школского року войдз порихтани/а учиц, алє и порихтани/a за шицко друге цо нє ма вязи зоз школу. Оцени прейду, алє памятки хтори направиш за тоти штири роки оставаю вельо, вельо длужей.