Каждого року єст вше менєй пари цо ше повинчали, а вше вецей таких цо ше розишли. У судских пресудох тих цо вецей нє могли далєй вєдно тлучиц, стої же ше розишли пре „нєпомирлїви розлики”, но вшелїяк добре познати даскельо основни причини прецо ше пари найчастейше розходза. Пред даскельома роками ше зявели и нови форми заєднїцкого живота, за хтори фаховци твердза же су краткого вика, алє и модел хтори ґарантує же малженство нє почнє пукац такой по свадзби. Традицийни малженства єст вше менєй, и шлєбодно мож повесц же и вони дожили якуш файту пременки. Єдни фаховци твердза же то прето же статус жени и хлопа виєдначени, други наводза други причини, а велї подзелєли думаня коло того же чи малженство превозидзена институция, чи нє.
Жени ше виборели за ровноправносц зоз хлопами и пре свою економску нєзависносц, постали вельо шлєбоднєйши. Дзивки ше наслухали вшелїячини од своїх бабох, добре им познати модел їх мацерох у малженстве и нє так як дакеди приставаю на одаванку. Кед ше на то одлуча, пред матичара з пару одходза вельо познєйше як дакеди давно кед ше дзивки лєдво чекали одац. З другого боку, велї леґинє на еманциповани дзивки патра як на цошка цо нє барз сиґурне за заєднїцки живот и нє приходзи им на розум нїч подписовац. Хто так роздумує, сиґурно же на малженство патри як на превозидзену институцию. Н, вшелїяк же єст велїх цо рационалнєйше патра на заєднїцки живот и праве з еманциповану будуцу супругу видза заєднїцку будучносц.
ИНСТАНТ ВЯЗИ
Вше частейше маме зявенє – инстант малженства хтори ше закончую скорей як цо, вообще, и почню. Найвекше число парох ше упознали прейґ дружтвених мрежох, но фаховци проґнозую же о штири-пейц роки найвецей будземе мац малженства хтори настали як познанства прейґ дружтвених мрежох. Вше вецей будзе и тих хтори поведза „гей, одам ше за це”, партнерови хторого нїґда нє видзели, лєм на основи виртуалней комуникациї, та ше рахує же з рока на рок будзе вше вецей розходи, бо ше предпоставя же кед так настали вязи, вони нє реални, алє виртуални. Нагли малженства нєстабилни, и звичайно препадаю накадзи ше двойо дакус лєпше розпознаю.
Добре познате же под час кризи число розходох драматично рошнє. Нєзанятосц, економски и финансийни проблеми, звадом и розходом „плодна жем”. Цалком сиґурне же би дзепоєдни малженства у лєпших економских условийох „прежили и виздравели”, алє гевти хтори були оддавна начати, осудзени на препасц. Нєдостаток финансийох нє єдина причина пре хтору велї надумани предлужиц далєй без своєй пари. Части причини розходох то и нєскладанє супружнїкох кед слово о воспитованю дзецох, алє и нєвирство. У дзепоєдних менших стредкох, ище вше покус ганьба розисц ше, алє у варошох то цалком нормалне зявенє. Но, окрем того же ше вше вецей розходза, млади вше менєй порихтани жиц зоз даским. Нє порихтани су за компромис, кариєра и гедонизем им на першим месце.
ПУКА КАЖДЕ ШТВАРТЕ МАЛЖЕНСТВО
По податкох Републичного заводу за статистику, у Сербиї прешлого року повинчани 37 000 малженства. Но, у истим периодзе ше розишла кажда штварта пара. Податки указую же у Войводини розходи ище частейши и же пука кажде треце малженство (Жридло РТВ).
Виглєдовали зме яка ситуация у Вербаше и у Коцуре.
Провадзаци тренд винчаньох и розходох малженских парох у Коцуре од 2010. року, по податкох зоз коцурскей матичней служби дознаваме же ше у валалє до рока повинчаю коло 30 пари. Вєдно, од 2010. року повинчани 179 пари.
Кед слово о розходох, од спомнутих 179 малженствох, по нєшка розвинчани пейц пари, и як цо видно, нє провадзи тренд вше частейших розходох.
– Можебуц нєполни 6 роки кратки период же би ше достала релевантна слика кед слово о розходох. Гуторим то прето, же до моєй канцелариї рочнє сцигню просеково 10 судски пресуди о розходу малженствох. И того року, ниа, уж розидзени 6 пари. Важне надпомнуц же кед ше тренд винчаньох и розходох у єдним року поровна, нє рахуюци же кеди, односно хторого року пара хтора ше розходзи повинчана, вец тот процент вельо векши – гвари Дюра Макаї, матичар у Коцуре.
Кед у питаню Вербас, по податкох зоз матичней служби у Вербаше,од хторей зме достали податки, од 2010. року по нєшка повинчана 831 пара. У периодзе од януара 2010. року по конєц юния того року, пред Основним судом у Вербаше розидзени 1 122 малженства ( на териториї Општини Вербас, Србобран и Кула), а лєм у Општини Вербас у спомнутим периодзе – 569 малженства.
Вше векше число розходох и кризу у фамелийох, психотерапеут Зоран Савески видзи у тим же система вредносцох хтора ше скорей преношела у фамелиї, розбита пре вецейдеценийни случованя на тих просторох, окреме пре войни и подлу економску ситуацию.
– Нєшкайша фамелия нуклеаризована, (лєм дзеци и родичи у нєй), вше менше число єй членох ю „трима”, девастована є и зоз становиска системи вредносцох хтори ше пестую у фамелиї и дружтве, вше є „худобнєйша” нє лєм структурално, економски и вредносно, алє и у тим цо нє так видно. Наша фамелия нєшка нє ма потримовку, а у трошительним дружтве, дзе борба за материялним богатством вше векша, барз чежко воспитовац дзеци у духу позитивних, традицийних вредносцох – прешвечени Савески.
ХТО МОЖЕ РАХОВАЦ НА ЗАЄДНЇЦУ ХТОРА ТИРВА?
Остатнї виглєдованя на вше актуалну тему о малженстве указали на тото же половка парох младших од 40 рокох пристава на малженство з колеґом, або колеґиню на роботи. Найчастейши арґумент хтори наводза то тот же вєдно препровадзую вельо часу, же ше добре упознали и полюбели. Таки малженства би могли буц щешлїви, гваря фаховци, поготов же исти професиї вибераю подобни характери, а нє раз пари маю и подобни становиска. Фаховци тримаю же праве таки модел барз добри за очуванє институциї малженства. Но, єдно сиґурне, у чаше у хторим жиєме, дзе намаганя мац свою шлєбоду вираженши як нїґда потераз, лєм партнере хтори ше добре познаю, розумя, и отворено о шицким бешедую, можу раховац на заєднїцу хтора тирва. Випатра будзе так, же доґод медзи двоїма єст любови и поради, будземе мац и малженства хтори вироятно дожию трансформацию до даяких нових фамелийних формох. Малженство як институция нє привозидзене, алє дефинитивно превозидзена його традицийна форма.