БЕОҐРАД – Скупштина Републики Сербиї вчера прилапела вименки Закона о здравственим осиґураню хтори би, медзи иншим, мали злєпшац положенє ваготних женох, та ришиц актуални проблем наплацованя солидарней порциї, преноша нашо медиї.
Кед ваготна жена дочасово нє годна робиц пре хороту, лєбо отримованє ваготносци, Републични фонд за здравствене осиґуранє 35 одсто заробку будзе уплацовац на рахунок роботодавателя, а нє роботнїци, та положнїци свой пенєж буду доставац на час.
Од 11. януара 2016. року шицки гражданє котри очкодовани на основи обрахованей солидарней порциї на обєдинєни заробки хтори пожнєли, а хтори виношели вецей як 60 000 динари, у филияли Порцийней управи у општини пребуваня годни придац вимогу за врацанє пенєжу, сообщела Порцийна управа.
Спрам нових вименкох, особи котри хасную здравствену защиту у иножемстве, потвердзенє о осиґураню буду доставац за цали час як су у иножемстве, а нє до найвецей 12 мешаци, як було потераз.
Вименки и дополнєня Закона о здравственей защити медицинским роботнїком оможлївюю дополнююцу роботу – єдну трецину роботного часу. Предвидзене и преруцованє сновательних правох клїнїкох з локалу на републику, за цо треба обезпечиц 150 милиони динари.
Скупштина прилапела и вименки и дополнєня Закона о здравственей документациї, по хторих ше початок його применьованя преклада за рок познєйше – на 1. януар 2017. року.