СЕРБИЯ – По новим Закону о способе утвердзованя найвекшого числа занятих у явним секторе, хтори ше почнє применьовац 12. октобра, жени котри робя у просвити треба же би пошли до пензиї кед маю 60,5 рок, односно кед нарок буду мац 61 рок. Медзитим, же би нє гамовало започати школски рок, им будзе понукнуте же би предлужели робиц по конєц того полроча, сообщело Министерство просвити.
Министер просвити Срдян Вербич потолковал же би пензионованє поремецело започату наставу, а нє спричинєло би орґанизацийни и функционални пременки, анї би ше нє зашпоровало, понеже би тоти роботни места требало пополнїц.
Предсидатель Синдикату образованя Сербиї Бранислав Павлович ище пред даскелїма днями критиковал законске ришенє по хторим колеґинї буду мушиц пойсц до пензиї и гварел же то дискриминация прето же им вжате право робиц кельо и хлопи.
Як оценєли просвитни синдикати, кед би ше вєшенї почало применьовац тот закон, до пензиї би мали пойсц найменєй 3 000 просвитни роботнїци.