НОВИ САД – При пестованю мацеринского язика при националних меншинох треба водзиц рахунку же би у унапредзованю язичней и културней розличносци нє пришло до процивней ситуациї – же би язик постал средство оцудзеня и подзелєня у дружтве, поручел Покраїнски омбудсман з нагоди Медзинародного дня мацеринского язика.
Мото тогорочного означованя того дня то „Квалитетне образованє, язики настави и резултати образованя”. Мацерински язик значни у образованю, а припаднїки националних меншинох маю право слухац наставу на мацеринским язику на шицких уровньох образованя, медзитим Покраїнски омбудсман обраца увагу же у Сербиї нє одвитуюцо ришене виучованє сербского як нємацеринского язика.
Ґу тому, понеже ше у АП Войводини и у остатку нашей держави ридко водзи управни, лєбо судски поступки на меншинских язикох хтори у службеним хаснованю, нєдостаточне знанє сербского язика окреме начкодзи жительом у штредкох у хторих национални меншини жию у векшим чишлє.