РУСКИ КЕРЕСТУР – Вчера дополадня ше на главней драги, на уходзе з Лалитю до Руского Керестура, запалєл и цалком згорел авто. Власнїк авта зоз Селенчи на час обачел же ше з превозки кури, та вишол и склонєл ше на безпечне место.
Як Рутенпрес нєурядово дознава од шведкох и присутних под час того збуваня, на авту ше запалєл мотор.
До помоци перши пришли роботнїки на блїзким жридлу водоводу и людзе котри ше там застали, а потим и професийна огньогасна єдинка з Кули.
Же ситуация була озбильна шведоча и два-три експлозиї на авту пре огень, а на щесце, нїхто нє покалїчени.
Гашенє авта тирвало коло 15 минути, а за тот час на драги пред мостом бул застановени транспорт.