СЕРБИЯ/РУСКИ КЕРЕСТУР – У 625 основних школох ширцом Сербиї, та и у керестурскей ОШ „Петро Кузмяк”, вчера отримане националне математичне змаганє „Мислиша”, у хторим участвовали 49 232 школяре, медзи нїма и 41 школяр з керестурскей Школи.
З керестурскей школи на змаганю участвовали школяре од штвартей по седму класу, дзе найвецей, 18, були зоз штвартей класи. Ришовали тести з интересантнима математичнима задатками, насампредз лоґично-комбинаторского характеру, алє у согласносци з їх школскима програмами з математики.
Як Рутенпрес дознава од координаторкох змаганя хторе отримане у Школи „Петро Кузмяк”, професоркох Наталиї Зазуляк и Татяни Бучко Рац, резултати змаганя буду познати 15. априла, понеже ше их оценє у Математичним дружтве „Архимедус” з Беоґраду, хторе и орґанизатор змаганя на националним уровню.
Циль того уж дзешатого змаганя популаризованє математики, а подобне змаганє 19. марца будзе орґанизоване и за штредньошколцох, хторе будзе мац медзинародни характер. Школа „Петро Кузмяк” участвує и на тим змаганю.