ДЮРДЬОВ – Всоботу, 9. мая, Месна заєднїца (МЗ) Дюрдьов орґанизовала означовенє Дня Дюрдьова, хтори на Дзуря, 6. мая, як здогадованє на дзень кед ше на тото швето 1800. року 203 фамилиї зоз Старого Дюрдьова, з терашнього Темерину, приселєли на простори терашнього Дюрдьова.
Означованє Дня Дюрдьова почало з пошвеценьом славского колача и просторийох МЗ, цо окончели православвни и грекокатолїцки парохове, а у просторийох Дому култури отворени два вистави – вистава малюнкох з ґалериї Општинскей народней библиотеки „Велько Петрович” у Жаблю и вистава старих викопинох з глїни и часцох скелетох животиньох хтори, як предпоставяю археолоґи, з 13. вику, а викопани су у дюрдьовским хотаре. На вистави малюнкох були и роботи Стевана Боднарова и Миту Пушкарова.
После того, у просторийох КУД „Тарас Шевченко” предсидателька Совит МЗ Дюрдьов Леона Виславски и предсидатель Комисиї за додзельованє наградох Совиту Мирослав Такач, додзелєли Плакети „Заслужни граждан Дюрдьова”. Плакети достали Ана Кисич, пензионерка, котра зоз закладаньом, визначну роботу и добрима идеями допринєсла лєпшому функционованю месного Здруженя пензионерох, и Тамбурови оркестер КУД „Тарас Шевченко” за дотерашню успишну роботу и посцигнути резултати на рижних змаганьох.
После урядовей часци, Тамбурови оркестер отримала кратшу музичну програму.
