ШИД – У Оддзелєню Фонду здравственого осиґураня у Шидзе ищє нє почало заменьованє терашнїх здравствених кнїжочкох з новима, хтори ше будзе електронски одчитавац.
Як за Рутенпрес потвердзел руководитель Оддзелєня Никола Кртинич, накадзи з централи Фонду сцигнє розказ о пременки кнїжочкох, поступок будзе започати, а вироятно будзе длужей тирвац.
Кртинич гвари же заняти найвироятнєйше кнїжочки буду заменьовац орґанизовано, прейґ подоприємствох, односно правних особох, а други осиґуранїки кнїжочки буду заменьовац поєдинєчно.
Вон додал и же пред тим треба обезпечиц условия за електронске одчитованє кнїжочкох у Доме здравя Шид и валалских амбулантох.