СУБОТИЦА – На нєдзелю, 3. мая будзе штварта манифестация Шветовей штафети за мир „Ран4юнити”, а у Сербиї будзе отримана у Суботици. На манифестациї участвую и дзеци и млади з Руского Керестура, Коцура и Нового Саду.
Штафета руши з острова Фиджи у Пацифику, и потим ше символично придава шлїдуюцей ґеоґрафскей ширини и так будзе облапени цали швет. Мото тогорочней манифестациї „Повязуйме ше: отриваюци братство”, на хторей дзеци и млади на велїх значних местох планети буду бежац же би указали свойо закладанє у вибудови мира и єдинства медзи народами.
На манифестациї у Суботици обегованє за мир почнє на 14 годзин, од Гали спортох по алеї Маршала Тита по Городску хижу, дзе будзе отримана Минута цихосци и молитва за мир.
Учашнїки потим у ОШ „Иван Милутинович” отримаю културно-уметнїцку програму и шведоченя з живота. Танєчну точку на програми виведу и млади з Руского Керестура, а вєдно з младима з Коцура буду шпивац и два руски шпиванки.
Главни орґанизатор тей шветовей манифестациї Рух фоколарох.