БЕОҐРАД – У рамикох програми „Активни заєднїци” Траґ фондация розписала конкурс за проєкти хтори уключую гражданох до ришованя проблемох локалней заєднїци. Конкуровац можу шицки здруженя и нєформални ґрупи з териториї Републики Сербиї, а тема нє конкретизована.
Проєкти можу буц з рижних обласцох – култури, медзиетнїчней толеранциї и сотруднїцтва, роботи з дзецми и младима, медзиґенерацийного сотруднїцтва, защити животного штредку, участвованя гражданох у процесох одлучованя, помоци чувствительним ґрупом и инклузиї. За єден проєкт мож достац найвецей 350 000 динари.
Найзначнєйше же би инициятива була на хасен локалней заєднїци, же би ше хасновало локални потенцияли и ресурси и сотрудзовало з другима секторами на локалним уровню и на тот способ порушовало активне уключованє гражданох до розвою заєднїци.
Проєкти мож посилац по 17. марец, а вецей информациї о критериюмох, упутстве за конкурованє и приявни формулар мож опатриц на линку www.tragfondacija.org/pages/sr/donacije-za-ocd/aktivne-zajednice.php лєбо писац на е-адресу office@tragfondacija.org.