РУСКИ КЕРЕСТУР – Прешлого тижня, спонтано ше орґанизовала гуманитарна акция за трочлену фамелию з Києва (старши родичи и їх дзивка), котра пре войну у України пребува у Керестуре у свойого приятеля Владимира Надя Ачима.
Свойочасово, док студирал у Києве, Надь пребувал у їх доме и глїбоке приятельство ше преширело и на керестурску школу зоз котру панї Олена концом осемдзешатих рокох прешлого вику, самоиноциятивно витворела сотруднїцтво, медзисобни нащиви делеґацийох двох школох и вельке приятельство по нєшка.
Праве тоти особи, тераз пензионовани професоре Слободанка Настасич и єй дзивка, Люпка Бачич Кочиш и Михайло Фейди зоз колеґами такой назберали пенєж и обезпечели им средства за гиґиєну, а случайно ше ту нашол и привреднїк Михайло Тиркайла котри член Ротари клубу Кула и з нїма назберали 12.000 дин. Керестурски наставнїки назберали ище 8.000 динари и купели велї основни поживово артикли и швиню, а керестурски месар ю безплатно обробел, же би мали обезпечене костиранє.
Ґу ланцу помоци придружели ше и керестурски парох о. Владислав Варґа, мала шестра Мартина, тиж особи вязани за керестурски Дом култури и велї други хтори помагаю тей трочленей фамелиї з Києва.
