СЕРБИЯ – Вчера, 17. мая, означени Медзинародни дзень борби процив хомофобиї, бифобиї и трансфобиї, хтори треба же би шицких здогаднул же шицки людзе маю исти права и шлєбоди у виражованю сексуалней, як и шицких других ориєнтацийох. Медзитим, представителє Ґей стрейт алиянси (ҐСА) визначую же найвекши проблеми ище вше дискриминация и насилство ґу тей популациї.
– То ище вше найзначнєйши проблеми, алє Министерство нукашнїх дїлох и нашо правни служби потераз процесуовали даскельо таки случаї – гвари Лазар Павлович зоз (ҐСА) и додава же ище вельо треба робиц на тим.
Защитнїк гражданох Саша Янкович поручел же права ЛҐБТ популациї нєдостаточно защицени, гоч у остатнїм периодзе направени значни крочаї, як цо то отримованє Паради пихи 2014. року, уключованє ЛҐБТ орґанизацийох до виробку документох хторим циль унапредзенє положеня тей популациї.
Медзинародни дзень борби процив хомофобиї, биофобиї и трансфобиї ше означує 17. мая, прето же того дня 1990. року хомосексуалносц вируцена зоз Медзинародней класификациї хоротох Шветовей здравственей орґанизациї.