СЕРБИЯ – Преход з аналоґного на диґитални ТВ сиґнал у Сербиї ма буц окочнени найпознєйше по 17. юний того року, a по 31. януар тирва приявйованє за доставанє безплатних апаратох хтори примаю диґитални сиґнал, односно „сет-топ боксох“ (СТБ). За безплатни апарати ше можу приявиц хаснователє социялней помоци, пенєжней помоци за допатранє другей особи и пенизионере котри жию сами, а чия пензия спада до найнїзших.
Прияву за додзельованє безплатних СТБ-апаратох и потребну документацию треба же би придац до центрох за социялни роботи, лєбо до Филиялох пензийно-инвалидского осиґураня, у зависносци од того хторей катеґориї припадаю.
„Сет-топ бокси” буду мушиц набавиц шицки котри маю хижни антени, а оценєте же таких у Сербиї єст коло 40 одсто. Хаснователє сателитскей, кабловскей телевизиї и гевти котри ТВ програми провадза прейґ ИПТВ нє буду мац нїяки трошки, прето же провайдере обезпечую опрему за приєм диґиталней телевизиї. „Сет-топ бокси” и нови телевизори треба же би мали желєну налїпку на хторей пише „digital TV”, цо ґаранция же задоволюю технїчни стандарди.
Дополнююци информациї о диґитализациї, як и потребних документох за доставанє безплатней опреми, мож опатриц на сайту Министерства тарґовини, туризму и телекомуникацийох – www.mtt.gov.rs